Pantagruel : "Ha, Panurge, où es-tu ?" Ce que ouyant, Panurge dict au roy et aux géans : "Par Dieu ! Ilz se feront mal, qui ne les départira." Mais les géans estoient aises comme s'ilz feussent de noces. Lors Carpalim se voulut lever de là pour secourir son maître ; mais un géant luy dist : "Par Golfarin, nepveu de Mahom, si tu bouges d'icy, je te mettray au fond de mes chausses, comme on faict d'un suppositoire ! Aussi bien suis-je constipé du ventre et ne peulx gueres bien cagar, sinon à force de grincer les dentz."

Puis Pantagruel, ainsi destitué de baston, reprint le bout de son mast, en frappant torche lorgne dessus le géant ; mais il ne luy faisoit mal en plus que feriez baillant une chicquenaude sus un enclume de forgeron.

Cependent Loup Garou tiroit de terre sa masse, et l'avoit jà tirée et la paroit pour en férir Pantagruel, qui estoit soubdain au remuement et déclinoit tous ses coups, jusques a ce que une foys, - voyant que Loup Garou le menassoit, disant : "Meschant, à ceste heure te hascheray-je comme chair à pastez ; jamais tu ne altéreras les pauvres gens !" - Pantagruel le frappa du pied un si grand coup contre le ventre, qu'il le getta en arrière à jambes rebindaines, et vous le trainnoyt ainsi a l'escorchecul plus d'un trait d'arc.

Rabelais, Pantagruel, chapitre 29.

Et parce que en ce propre jour nasquit Pantagruel, son pere luy imposa tel nom : car panta en grec vault autant à dire comme tout et gruel en langue Hagarene vault autant comme altéré, voulent inférer que a l'heure de sa nativité le monde estoit tout altéré, et voyant en esprit de prophétie qu'il seroit quelque jour dominateur des altérez, ce que luy fut monstré a celle heure qui lui fut montré a ce moment même par un autre signe plus évident.

Car, alors que sa mere Badebec l'enfantoit et que les saiges femmes attendoyent pour le recepvoir, yssirent premier de son ventre soixante et huit tregeniers, chascun tirant par le licol un mulet tout chargé de sel, après lesquelz sortirent neuf dromadaires chargés de jambons et langues de beuf fumées, sept chameaulx chargés d'anguillettes, puis XXV charretées de porreaulx, d'aulx, d'oignons et de cibotz ce que espoventa bien lesdictes saiges femmes. Mais les aulcunes d'entre elles disoyent : "Voicy bonne provision. Aussy bien ne bevyons-nous que lâchement, non en lancement. Cecy n'est que bon signe, ce sont aguillons de vin."

Et, comme elles caquetoyent de ces menus propos entre elles, voicy sortir Pantagruel, tout velu comme un ours, dont dist une d'elles en esperit prophéticque : "Il est né à tout le poil, il fera choses merveilleuses, et s'il vit, il aura de l'eage."

Rabelais, Pantagruel, chapitre 2.